«Ye necesario que Ledo y Barbón refuercen el diálogu cola ministra con determinación», insisten los docentes d’asturianu

Miembros de l’Asociación de Docentes d’Asturianu y Eonaviego/Gallego-asturiano (ADAE), que ta acabante d’asoleyar un videu en redes sociales pa sensibilizar sobre la so situación llaboral, tán rexistrando de manera individual pidimientos a Milagros Tolón pa la creación de la especialidá

La Conseyería d’Educación y el Ministeriu d’Educación, Formación Profesional y Deportes tán calteniendo contautos por cuenta la creación de la especialidá docente de Llingua Asturiana y Gallego-asturiano, pero dende l’Asociación de Docentes d’Asturianu y Eonaviego/Gallego-asturiano (ADAE) insisten «na necesidá de qu’Eva Ledo y Adrián Barbón refuercen el diálogu cola ministra y el so equipu con firmeza y determinación». El coleutivu, qu’ayeri asoleyó un videu nuevu pa redes sociales, sigue cola so campaña pa visibilizar la so situación llaboral y pa reclamar los sos derechos llaborales.

Ésti sirve d’apoyu a la aición nueva que ta desenvolviendo depués del desplazamientu del 30 de marzu a Madrid pa manifestase frente a la sede ministerial y el Congresu. Consiste nel rexistru de manera individiual de pidimientos a la responsable d’Educación, Milagros Tolón, col oxetivu d’acelerar una solución a la so problemática, que pasaría por una modificación del los actuales reales decretos d’especialidaes. A les poques hores d’asoleyase, la pieza audiovisual nel que se ven a dellos maestros y maestres de les materies de Llingua Asturiana y Gallego-asturiano con cartelos nel que recueyen les sos reivindicaciones, acumula miles de visites, 6.000 nes dos primeres hores.