L’Atalaya va acoyer el 14 de xunu esta novedosa iniciativa del Conseyu de Mocedá de Xixón na que persones de 14 a 35 años van engarrase nestos enfrentamientos dialéuticos tan populares ente la xente mozo emplegando l’asturianu nes sos rimes
Cimavilla, en concreto L’Atalaya, va convertise nel epicentru del freestyle n’Asturies el sábadu 14 de xunu cola celebración de la primer ‘Batalla de Canciones’ n’asturianu. MCs —términu pa referise a los raperos, que provién de ‘master of ceremony’ inglés o ‘maestro de ceremonies— d’ente 14 y 35 años van enfrentase dialéuticamente nel Auditoriu Dr. Francisco Rodríguez Xovellanos dende les 16 hores con rimes en llingua asturiana nuna cita inédita nel territoriu.
Les bases d’esta iniciativa del Conseyu de Mocedá de Xixón, que cuenta cola collaboración del Ayuntamientu al traviés de la Oficina de Normalización Llingüística y de HHopcast, marquen que los participantes han tener preparaes un mínimu de tres cantares propios. El xuráu va valorar «l’inxeniu, dinamismu, nivel llingüísticu y la espontaneidá, intentando facer les batalles lo más prestoses posibles pa tol públicu asistente», quedando escluyíes aquelles intervenciones «con espresiones ofensives, qu’inciten al odiu o qu’atenten escontra los drechos de terceres persones, con especial atención n’aquelles con conteníu xenófobu, racista, LGBTIQ+fóbicu, capacitista, facista o machista». Asina, la organización asoleyó un testu de llamamientu coleutivu al cuidáu nel qu’afala a «crear un espaciu inclusivu» con conseyos sobre cómo actuar nel casu de sufrir o presenciar una agresión.
La inscripción pa la primer ‘Batalla de Canciones’ n’asturianu ye de baldre, con un tope máximo de 20 participantes, que van tener a disposición un equipu de soníu. El ganador va llevar 300 euros y la distribución dixital a cargu del portal Musicasturiana, mientres que’l segundu clasificáu va recibir 200 euros y un productu de PuruRemangu y el terceru, 100 euros. Esti concursu, importante pa treslladar a la llingua asturiana a los ámbitos nos que se mueve la xente mozo asturiano, ye un vieyu enfotu del Conseyu de Mocedá, que lleva más d’un añu en contautos pa poder desenvolvelu.
