L’alcalde Alfredo Canteli anunciólo na inaguración d’Ofelia, la nueva feria del llibru uvieína que cuenta hasta’l domingu con 34 casetes n’El Campo San Francisco
Xuan Bello, ún de los escritores más importantes de les lletres asturianes, fináu en xunetu a los 60 años, ta presente n’Ofelia, el nome que lleva’l nuevu formatu de feria del llibru que llega pa sustituyir a LibrOviedo. El de Paniceiros, mui venceyáu a la ciudá, tuvo presente ayeri na inauguración de la mesma, al igual que la obra que dedicó a Uvieú, ‘Al dios del lugar’, momentu nel qu’Alfredo Canteli aprovechó p’anunciar que la biblioteca del Centu Social de La Ciudá Naranco va llevar el so nome como reconocimientu a la so figura.
Tanto l’alcalde como la conseyera de Cultura, Política Llingüística y Deporte, Ana Vanessa Gutiérrez, lleeron cachos del llibru de Bello, asina como otros representantes municipales, nun actu nel que la tamién escritora, mui cercana al tinetense, nun pudo ocultar la so emoción. Entrambos dieron un paséu peles 34 casetes instalaes n’El Campo San Francisco, en concreto nel paséu del Bombé, que van tar abiertes hasta’l domingu de 11 a 15 y de 17 a 21 hores.
