La escritora xixonesa merez esti gallardón de los Premios Lliterarios 2025 qu’entrega la Conseyería de Cultura, Política Llingüística y Deporte por esti poemariu qu’entellaz «una historia d’amor, una historia sobre’l llinguaxe y un contestu afeutáu pol mundu»
El poemariu ‘Esti amor asturfalante’ da a Sofía Fernández Castañón el XXXI Premiu Xuan María Acebal de poesía, ingresando asina’l so nome ente los ganadores de los Premios Lliterarios que da la Conseyería de Cultura, Política Llingüística y Deporte nes sos diferentes estayes. El xuráu del gallardón tuvo conformáu pola filóloga Iris Quintana y los poetes Taresa Lorences, Alba González Sanz, Rodrigo Olay y Miguel Rodríguez Monteavaro, ganador de edición pasada con ‘Al disparar nunca parte’, con Antón García, direutor xeneral d’Aición Cultural y Normalización Llingüística, como presidente, y Laura Marcos, filóloga de la conseyería, como secretaria.
Nel acta destacaron «la madurez de la obra, la so capacidá de conmover y remover emociones, un usu del asturianu especialmente cuidáu y la solvencia na estructura d’un poemariu nel qu’una historia d’amor, una historia sobre’l llinguaxe y un contestu afeutáu pol mundo entellácense nun testu con versos de llargu aliendu». Castañón, conocida amás de pola so trayeutoria como escritora pol so llabor como realizadora audiovisual y el so pasáu como diputada nel Congresu por Podemos, lleva un recompensa de 6.000 euros y va ver espublizada la so obra.
Ésti ye’l quintu gallardón que se falla de los nueve Premios Lliterarios. Enantes diose a conocer qu’Agustín Cernuda y Alejandro Castrillo Cernuda merecieron el XVII Premiu Alfonso Iglesias de cómic por ‘Mil venecies’; Iris Díaz Trancho’l XXXI Premiu Máximo Fuertes Acevedo d’ensayu por ‘Al verde d’El Cierru’; Marina Pangua’l XLVI Premiu Xosefa Xovellanos de novela por ‘Bisarma’; y Marián García y Xurde Fernández el XVIII Premiu María Josefa Canellada de lliteratura infantil y xuvenil por ‘Ascensoristes S.A.’. Amás, la conseyería entama otros tres de calter artísticu.
