L’artista asturianu anunció esti vienres les primeres feches del so tour nuevu «La belleza»
Polifacéticu, carismáticu, tradicional, vanguardista… Rodrigo Cuevas (Uviéu, 1985) ganó a pulsu, con cada cantar y con cada actuación, ser anguaño ún de los artistes más reconocíos dientro y fuera d’Asturies. El carbayón enllazó nos años últimos ésitu con ésitu, y el so discu últimu, Manual de romería, convenció a públicu y crítica, lo que lu ayudó pa ser reconocíu col Premio Nacional de las Músicas Actuales nel 2023 o, más recientemente, Premio «La Barraca» de la UIMP.
Sonáu foi tamién esti miércoles el so cantar últimu, «Un mundo feliz», una utopía asturiana cantada xunto a la icónica Massiel. Depués del so asoleyamientu, agora l’asturianu anuncia les que van ser les primeres feches de la so xira nueva, «La belleza», que lu llevarán a actuar el 21 de setiembre n’Uviéu, en fiestes de San Mateo. Amás d’esta parada, Cuevas va tar el 24 de abril n’Avilés, el 30 n’A Coruña, el 9 de mayu en Barcelona, el 17 d’esi mesmu mes en Donosti, el 24 de xunu en Madrid, el 25 de xunetu en Cartagena y el 12 d’agostu en Santander. Tal y como confirmó l’artista a traviés de les sos redes sociales, les entraes pa toles actuaciones van tar pronto a la venta.
