La banda uvieína actúa esti vienres en San Mateo, na Plaza Feijoo como grupu convidáu de la xornada inaugural del Concursu de Rock, mientres prepara ‘The Thrill Is Not Gone’, el so primer álbum en 7 años, que va presentar n’ochobre tamién na ciudá
Dende’l 2019, na so xira pol venti aniversariu, nun xube Stormy Mondays a un escenariu en San Mateo. Munchos años pa una banda que tien rexistraes nes fiestes llocales dalgunos de los momentos más especiales de la so trayeutoria, como aquella collaboración improvisada con Slash nel 1992. Güei, cola primer parte del so álbum doble ‘The Thrill Is Not Gone’ a piques de salir del fornu —la so presentación ta anunciada pal 24 d’ochobre nel Sala de Cámara del Auditoriu—, toca a les 23.30 hores na plaza Feijoo como convidáu nel Concurso de Rock Ciudad de Oviedo Alejandro Blanco ‘Espina’, una bona escusa pa falar con Jorge Otero (Uviéu, 1975), voz, guitarra y compositor del grupu, d’esti proyeutu y del percorríu de la formación.
Pue dicise que práuticamente abren San Mateo. ¿Qué supón para Stormy Mondays tocar en casa y en fiestes?
Agradezse tornar. Pa nós ye amás una novedá poder tocar nel escenario del Concursu de Rock. Paezme una idea fantástica y prestáme que nun se pierda, sobre manera que siga llevando’l nome d’Alejandro Espina. San Mateo ye una especie de segunda casa pa Stormy Mondays y creo que nunca tuviéremos tantos años ensin tocar, asina que tenemos munches ganes.
Tán piques de presentar el so trabayu nuevu, ‘The Thrill Is Not Gone’, pero llevaben dende ‘Nebraska’, nel 2019, ensin asoleyar álbum. ¿Por qué esti silenciu compositivu nun grupu tan prolíficu como’l de vueso?
La verdá ye qu’estes composiciones entamamos a grabales nel 18, añu nel que fiximos unes sesiones mui fuertes de composición, grabación… Básicamente yo recopilé tolo que llevábamos ensin terminar o empecipiáu recién. Y eso, nuna época de trabayu mui intensu, grabámoslo too. Lo que pasa ye que quedamos tan agotaos que se nos ocurrió, pa descansar ente comines, la idea de grabar el ‘Nebraska’ de Springsteen en versión llétrica, que diba ser una especie de breve paréntesis: ‘Facemos el discu, damos dos conciertos, n’Uviéu y Madrid, y llueu tornamos al estudiu’. Ésa yera la idea, lo que pasa ye que ente’l primer y el segundu conciertu pasaron dellos años porque nos pilló la pandemia… Y claro, descarrilónos tol calendariu.
Llueu llega un momentu nel que dices ‘bono, esto hai qu’acabalo yá por narices’, asina que nos metimos otra vegada y al final va salir un discu doble, que ye no que tábemos trabayando tamién dende’l primer momentu. Llevamos trabayando en 20 cantares dende entós.
«San Mateo ye una especie de segunda casa pa Stormy Mondays y creo que nunca tuviéremos tantos años ensin tocar, asina que tenemos munches ganes»
¿Qué pue dicime d’él?
El primer volume va salir n’ochobre, vamos presentalu nel Auditoriu’l día 24, y el segundu vamos tenelu pal primer trimestre del añu qu’entra, pongamos marzu. Musicalmente ye cuasi un resume de la nuesa trayeutoria, porque tolos estilos y influencies musicales que tán nel nuesu soníu tán presentes nesti discu. Y bono, siempre intentamos da-y dalguna nota de color mayor. Amás, hai yá bastantes años que trabayamos nel nuestru propiu estudio de grabación, que pesllamos al públicu cuando nos xuntamos, y eso da más posibilidaes d’esperimentar con soníos. Pero bono, que naide s’asuste, que nun nos pasamos a la lletrónica nin nada asemeyao (rises). El soníu ye’l nuesu de siempre, lo que pasa ye qu’apaecen más instrumentos raros, como siempre nos presta facer. Tamos disfrutando muncho la parte d’estudiu.
¿Ayuda muncho tener esa posibilidá de gastar hores nel estudiu?
Ayuda, pero tamién ye un peligru porque, al final, si nun te pones una fecha tienes el riesgu de que los discos nun salgan nunca. Entós tuvimos qu’obliganos a facer nós mesmos de la nuesa compañía, que nos esixe discu y pon fecha pa sacalu.
Yá hebo dellos adelantos del discu. ¿Qué recibimientu tuvieron?
Por suerte, mui bonu. Fiximos una cosa que nun fixéramos nunca, que ye lo que fai tol mundo: dir sacando’l discu poco a poco, sacando los singles. Yá vamos cuatro, tenemos previsto’l quintu pal 2 d’ochobre, y la verdá ye que, como nun lo fixéramos nunca, divertímonos sacando los cantares ún a ún y viendo que-y pues dar tamién más atención a cada canción. Y bono, los siguidores tamién lo disfruten d’otra manera. Pero tamién tenemos ganas de ver la obra completada; gústennos los formatos físico. Nesi sen, va haber un vinilu especial, 10 pulgaes; va a haber CD… L’otru día vi que tornen los CDs… Nel nuesu casu nunca marcharon, nin como músicos nin como oyentes.
«Divertímonos sacando los cantares ún a ún y viendo que-y pues dar tamién más atención a cada canción»
El quintu cenciellu ye una versión de ‘Photograph’, de Ringo Starr y George Harrison del 1973.
Sí, escoyimos un cantar de los Beatles, pero en llugar de ser de Lennon-McCartney ye de Ringo y de George. Naquel momentu foi un pequeñu ésitu pa Ringo Starr; creo que se nota muncho que ye una canción de George, pero si la firmaron los dos ye porque los dos aportaron. Foi un cantar que nos llamó muncho l’atención viendo’l conciertu por George que fixeron al añu de la so muerte, el conciertu d’homenaxe, porque creó un clima ehí, nel escenariu, con Rigo y tolos acompañantes, mui emotivu, y pensamos en grabala, porque amás ye una canción qu’en realidá nun la conoz cuasi naide.
Fiximos una coproducción con Miguel Herrero, que ye’l nuestru trompetista pero también ún de los meyores productores d’Asturies, ún de los meyores estudios qu’hai n’Asturies ye d’él, y creamos asina una muria de soníu un poco tipu Phil Spector. La verdá ye que tamos mui contentos. El día 2 va poder sentiense en toles partes y tenemos munches ganes de ver qué-y paez a la xente.
¿Quién conforma anguaño Stormy Mondays?
Siguimos los mesmos va unos cuantos años: Pablo Bertrand, Danny Montgomery y Juanjo Zamorano. Y llueu, nos conciertos, siempre nos acompañen los nuesos asistentes de viento Miguel Herrero y Kiko Flores. Pal del día 24 vamos contar col guitarrista nel nuesu primer discu, Nacho García, y vamos convidar a más xente que collabora nel álbum nuevu.
El grupu va yá pa la cuarentena… ¿Qué ye lo que vos motiva o mueve a siguir col proyeutu?
Yo creo que nun dexalo ye un ésitu en sí mesmo. Y creo qu’eso mesmo ye tamién lo que nos motiva a siguir nun dexándolo. Va tiempu que nos dimos cuenta de que yá ye un poco tarde pa dexalo… Como decía Morrison, ‘ye demasiao tarde pa parar agora’. Nós tamos metíos nesto, consiguimos mantener unos trabayos que nos permiten siguir faciendo música, que ye una cosa de la que por fin la xente yá empieza a falar: poquísimos músicos viven solamente de tocar y los que viven solamente de la música son profesores. Nós consiguimos montar la nuesa vida de tal forma que nos permita que Stormy Mondays nun desapaeza y más ésitu qu’ési… Si dalgún día lleguen les ventes millonaries nun diremos que non, pero la motivación a siguir ye una motivación en sí mesma.
«Entovía podemos tar a tiempu de retiranos siendo famosos porque’l rock pasó a tar de moda otra vez»
Mirando p’atrás, son munches les coses algames nestes décades, inclusive a nivel internacional.
La verdá ye que tenemos munches coses llamatives, anéudotes o llogros que yo nunca m’aburro de repetir porque ¡ye que lo fiximos! Efeutivamente, ¿vas contar que tocasteis en Woodstock en el 99? Pues sí, yá que l’únicu grupu español que tocó nun festival de Woodstock ye Stormy Mondays, y fíxolo ensin tener discográfica nin siquier. Entós, claro qu’hai que contalo. O qu’un cantar tuyu sonara nel espaciu, nes tresbordador espacial Endeavour… Ye pa contar a los mios nietos o al que faiga falta. Tamos en San Mateo y hai que recordar que Slash decidió xubir al nuesu escenariu nel 92. O cuando toqué con Springsteen en Nueva Jersey esti avientu va 20 años. Son casualidades musicales qu’ehí tán y son parte de la historia del grupu.
Güei toquen como convidaos na primer xornada del Concurso de Rock Ciudad de Oviedo Alejandro Blanco ‘Espina’. Magar que’l xéneru caltiénse fuerte, ¿nota un retrocesu ente la xente mozo?
Anque suene mui a cantar de Miguel Ríos, que lo ye, el rock and roll nun muerre. Igual tien agora mesmo una época de baxa popularidá, con una xeneración nueva que siente la música que-y ofrecen y yá; una época na que nun se molesten n’investigar más allá, pero hai dalgunos que sí y la suerte ye qu’agora ta too a la to disposición. Pues dicir ‘a min esto de Bad Bunny nun me mola, ¿habrá más coses? Ah, pues hailes’. Entós, a partir d’ehí pues dirixite a lo que quieras, investigar no que quieras… Puedes consiguir tola música qu’esiste. Si alguien te guía, ya sía dalgún llibru, dalgún collaciu, dalguna película… Entós, nun lo veo mal. Creo qu’entovía podemos tar a tiempu de retiranos siendo famosos porque’l rock pasó a tar de moda otra vez.
