Neños xeolocalizaos, adultos paranoicos

Nos últimos años, estendióse la práctica de que padres de fíos adolescentes xeolocalicen permanentemente a los sos fíos adolescentes col GPS del móvil (…) Toos entendemos la molición insoportable de cualquier padre d’un o una adolescente, pero ¿cuála ye la estación términu d’esi tren? Los beneficios al curtiu plazu (la tranquilidá), ¿tamién van traducise en beneficios al llargu?

El futuru yá ta equí. Vivimos nél, nel futuru. Y el futuru trespórtanos a cada vez más velocidá; tanta que dacuando ye difícil apreciar los detalles del paisaxe que cuerre al otru llau del cristal; saber ónde diaños tamos, amás de nun tren. La modernidá esbócase, esbócanos, y, nel vértigu del esboque, nun cavilgamos abondo delles decisiones que tomamos ensin pensar, y que determinen rumbos alternativos del porvenir. Cada vez sopesamos menos les consecuencies al llargu plazu de les coses. Naide piensa nel llargu plazu na dictadura del carpe diem.

Nos últimos años, estendióse la práctica de que padres de fíos adolescentes xeolocalicen permanentemente a los sos fíos adolescentes col GPS del móvil. Chavales de non yá once o doce, sinón trece, catorce, quince años, que nun dan un pasu del que nun puedan enterase los sos proxenitores. Toos entendemos la molición insoportable de cualquier padre d’un o una adolescente, pero ¿cuála ye la estación términu d’esi tren? Los beneficios al curtiu plazu (la tranquilidá), ¿tamién van traducise en beneficios al llargu?

Azaña dicía que la llibertá nun fai felices a los homes: failos, cenciellamente, homes. O muyeres. Ciudadanos, adultes. Nun hai llibertá auténtica que nun venga apareyada a coses desagradables: mieos, riesgos, trespiés que, si nun nos maten, fáennos más fuertes. Un chaval xeolocalizáu nun ye un chaval llibre. Ye seique un chaval seguru, y ye lexítimo aldericar qué opción ye más xusta nesti dilema, mientres s’asuma qu’esi dilema esiste; que nun se puede cuadrar el círculu. Hai qu’escoyer. Y dacuando una especie de diañu folixeru arruina, disuelve, arrampúñanos a la llarga hasta aquello qu’escoyemos. La seguridá que pretendemos regalar a un adolescente al nega-y la llibertá, ¿nun va terminar por tarmiase a sí mesma y volvelos inseguros, ineptos pa enfrentase a los baches de la esistencia, que —esto sí que ye impepinable— nunca-yos podremos apandar? Vivimos nun país con inseguridaes —como toos—, pero nun vivimos nun país inseguru. Si instilamos a los neños el mieu a una inseguridá que nun esiste, volverémoslos paranoicos, y la paranoya nun crea sociedaes sanes nin amables… nin polo tanto segures. Podemos acabar enredaos nuna profecía autocumplida, metíos nel país inseguru que van crear —que yá tamos creando— los fíos pusilánimes d’esta sobreprotección. Que per otru llau contrasta cola infraprotección qu’espachamos a otros respectos, nesti sieglu de paradoxes.

El móvil que xeolocaliza a esos adolescentes, munches vegaes lu tienen dende los diez, once, doce años. A la fía de doce años d’unos conocíos d’esti columnista acaben de regala-y el primeru. La so madre, mui esmolecida poles pantalles, yá nun podía negá-ylo más tiempu: yera la única neña d’esa edá del so colexu que nun lu tenía. Y xulgó —como creo que fadría yo— que llega un momentu en que ye peor volver «rarina» a la neña nel so contestu, enzanca-y la socialización, nega-y les modes qu’aceiten les conversaciones de la so dómina. Asina que-y dieron un ‘smartphone’ simplificáu, pa que solo pueda llamar a una llista de númberos concretos y mandar mensaxes, non navegar per Internet, nin xugar a videoxuegos. Ún negocia y pauta tamién col so tiempu, pero ¿qué tiempu absurdu ye esti nel que nos esmolecen les casi reales del 25 país mas seguru del mundu, pero unviamos alegremente solos, inconcebiblemente desnudos, a los neños a los caleyones dixitales de la nuesa dómina, ellos sí una nueche apinada de terrores? ¿Qué ciudadanos futuros van poder remanecer d’esta moral boborola, que lo fai too al revés?