Montse Tomé ye la embaxadora de la DOP Sidra d’Asturies pa esti 2026

La polesa, exseleicionadora femenina de fúbol d’España, recibió esti reconocimientu en casa, nel marcu del XV Salón Sidra d’Asturies que se celebró esti miércoles na Plaza d’Abastos; Sidra Contrueces resultó escoyida como meyor sidra natural DOP

La Pola Siero agospió esti añu’l XV Salón de Sidra d’Asturies, entamáu pol Conseyu Regulador de la Denominación d’Orixe Protexida (DOP), que decidió reconocer a una polesa, Montse Tomé, como embaxadora d’esti productu fechu convariadaes de mazana asturiana esbillaes. La exseleicionadora femenina de fútbol d’España recibe esti honor que se-y otorga «a una persona o grupu pol so venceyu o collaboración cola Sidra d’Asturies».

Cerca de dos millares de persones acudieron ayeri a la Plaza d’Abastos, onde hebopresencia de profesionales del sector sidreru, esto ye, llagareros, productores, collecheros, distribuyidores y hosteleros. Na xornada entregáronse los premios que reconocen a la Meyor Sidra d’Asturies d’esti añu, que, nel casu de la natural, viaxó pa Xixón, al ser valorada col oru la producción de Sidra Contrueces. La plata llevóla la sierense Quelo y el bronce Valdeboides, fecha pola mariñana Castañón.

El llagar maliayu El Gobernador recibió un doble reconocimientu, el de meyor sidra esplumosa por EM y el de meyor filtrada por España, mentes que Juan Antonio Junco recibió’l premiu al collecheru del añu. «La sidra nuevo DOP vien con una altísima calidá, foi un añu mui bonu de mazana al respeutive la calidá», aseguró en castellanu Jorge García Álvarez, presidente del Conseyu Regulador, que considera que «tamos nel meyor momentu de la sidra DOP, pero tamién nel meyor momentu pa trabayar por ello nos años próximos. Podemos dar un blincu cuantitativu y consumir lo nuestro, el productu asturianu».

Ente los retos que se marca García Álvarez ta «siguir medrando en ventes a un ritmu un 10 % tolos años, como venimos faciendo, hasta invertir la proporción actual qu’hai n’Asturies de consumu de sidra. Queremos llegar al 80 % de tol consumu d’Asturies», pa lo que se necesita «más plantaciones, más producción». Amás anunció la inclusión na DOP de la sidra de xelu y una sede nueva pal Conseyu Regulador que sía «un llugar d’alcuentru».