Rosalía sale vistida de monxa na portada de Lux, y da entrevistes nes que diserta sobro la necesidá social contemporánea de trescendencia y espiritualidá y el so alcuentru personal cola tradición católica. Ye una tema de la qu’entama a falase; paez qu’hai un revival relixosu incipiente, un interés creciente pola relixón ente los mozos
Toi lleendo estos díes El yoga, nuevo espíritu del capitalismo, un llibru de Zineb Fahsi sobro l’apropiación occidental y capitalista del yoga, un conxuntu de práctiques indies a les que se-yos invirtió la misión en pasándoles pol filtru del hippismu californianu. La cosa, na India, diba de l’ascesis y la disolución del yo, pero la yoga que mos vienden n’Occidente, viéndenmosla como too lo contrario. Un resalte del individuu; una vía pa que’l yo «s’atope a sigo mesmu» y algame la plenitú tanto física como mental. Asina lo esplica Fahsi nel primer capítulu:
«la yoga paez satisfaer d’una manera ablucantemente conveniente les ambiciones contemporánees de plenitú y autorrealización. Sicasí, si esaminamos los testos antiguos a los que se remite la yoga contemporánea davezu practicada nes ciudaes grandes, nun vamos atopar ellí nenguna promesa de bienestar, felicidá o espansión; nenguna invitación a “soltar”, a “vivir el presente”, a “relaxase” nin a “convertise en sigo mesmu”; nin menos entá recetes milagroses p’aportar a los distintos estaos equí mentaos. Los testos más conocíos polos yogin contemporáneos, al contrariu, caracterícense por un enclín fuerte al ascetismu, por una visión negativa de la condición humana ordinaria, considerada n’esencia miserable y sufriente, por un llamáu a abandonar la busca del ésitu y la felicidá nesti mundu».
Apropiación cultural, yá se sabe. Facémoslo tol tiempu: garramos les coses d’otres cultures, escontestualizámosles, vaciámosles de conteníu y convertímosles en disfraces; nun envoltoriu exóticu de los nuesos refalfios occidentales. Pero al lleer el llibru de Fahsi coincidiendo col llanzamientu del nuevu discu de Rosalía, entruguéme si nun ta pasando lo mesmo, non yá coles relixones de les antípodes, sinón cola más nuesa; col catolicismu.
Rosalía sale vistida de monxa na portada de Lux, y da entrevistes nes que diserta sobro la necesidá social contemporánea de trescendencia y espiritualidá y el so alcuentru personal cola tradición católica. Ye una tema de la qu’entama a falase; paez qu’hai un revival relixosu incipiente, un interés creciente pola relixón ente los mozos. Se-y busquen esplicaciones que suenen convincentes: una esperanza a la que garrase nun tiempu de congoxa poles catástrofes que vienen, la seducción del silenciu de la oración énte la fartura d’una dómina de ruiu y frenesí, l’atracción pola magnificencia y perdurabilidá de la estética católica nun tiempu de consumismu desenfrenáu y de cultura del «usar y tirar»… Tamién tenemos de pensar —apunta Jorge Marirrodriga nun artículu n’El País— en «una mocedá ensin idees preconcebíes sobro’l catolicismu. Nun país onde una parte grande de los menores de 30 años nun recibió formación relixosa significativa, el catolicismu preséntase como daqué casi exótico». La mía ye la última xeneración qu’entá vio la relixón entetexía nos llances más menudos de la vida cotidiana. La cosa yá taba bien menguada, yá amorrentaba n’aquellos años noventa, pero entá tuvimos güeles que se persinaben cuando xubíen a un autocar, que cuntaben en padrenuesos y avemaríes los tiempos de la cocina; vivimos en barrios nos qu’entá yera lo normal dir a misa los domingos, atopar ellí a los collacios y facer toos xuntos la Primer Comunión. Les xeneraciones nueves yá nun viven, polo xeneral, nada d’eso. Y entós la relixón católica yá nun-yos paez daqué vieyo qu’amorrenta, sinón que pueden atopala como la novedá escitante en que puede convertise la tradición cuando’l so fluxu cortóse va tiempu, pero reiníciase de secute; o un artefactu arqueolóxicu llamativu, al remanecer del sosuelu.
Too esto tien munchu sentíu. Pero tamién mengua daqué al cocer. Rosalía tamién reivindica la mística, pero ¿qué mística ye esta que nun busca eslleír el yo, fundise en Dios, esmorecese en Cristu y nel próximu, sinón una manera más de vocinglar el nuesu DNI al alto la lleva? ¿Tamos, realmente, énte una impugnación del capitalismu neolliberal, o énte una más de les sos espresiones?
