Matadero Uno y Kafka & Co acueyen alcuentros d’autores n’asturianu con creadores n’otres llingües

El programa ‘Afinidaes eleutives. Alcuentros lliterarios en llibreríes’ entamáu pol Ministreriu de Cultura y Deporte llega esti setiembre a siete llibreríes independientes asturianes, ente elles dos d’Uviéu; Aratnza Margolles y Xaime Martínez van aldericar con escritores en castellanu y gallegu

Nel 2021, la Direición Xeneral del Llibru, del Cómic y de la Llectura del Ministeriu de Cultura y Deporte incorporó per primer vez al asturianu nel so programa ‘Afinidaes eleutives. Alcuentros lliterarios en llibreríes’, programa que pretrende impulsar l’actividá en comercios independientes y poner en valor la pluralidá lingüística, favoreciendo’l diálogu ente autores en diferentes idiomes del Estáu y contribuyendo a la difusión de lliteratura. Una iniciativa que tuvo una gran receición n’Asturies y qu’ayudó a llevar les lletres asturianes a otros autonomíes, y qu’esti añu repite cola participación de siete negocios, la práutica totalidá en setiembre —yá hebo una actividá previa en xunetu—, y catorce escritores.

N’Uviéu son Matadero Uno y Kafka & Co les dos inscrites a esta iniciativa. La primera va axuntar el vienres a les 19 hores a Arantza Margolles y l’autor lleonés en castellanu Abel Aparicio, “dos escritores mui vinculaos al mundu rural y a la revindicación de la memoria histórica”, apunten dende’l comerciu asitiáu na plaza de Riego. Los títulos ‘Fuimos granos d’arena. La solidaridá n’Asturies énte’l desastre d’Annual’ y ‘¿Dónde está nuestro pan?’, de manera respeutiva, son sobre los que va xirar l’alderique.

Mentes, na llibrería d’Idelfonso Sánchez del Río númberu 14, van tar presentes Xaime Martínez y la gallega Alba Cid el sábadu 20 a les 13 horas. El restu de llibreríes participantes son la xixonesa La Madriguera, con Pablo Fraile y la escritora venezolana residente en Barcelona Inma Borges (castellanu), el sábadu 20 a les 12 hores; la mierense La Pilarica, el xueves 25, con Francisco Priegue y Emma del Pilar Pedreira (gallegu); l’avilesina La Crisálida, el vienres 26, con Daniel García Granda y Àngels Gregori (valencianu); y la tamién xixonesa La Revoltosa, con Francisco ‘Paco’ Álvarez y Uxue Alberdi (eusquera), el sábadu 27.