Los Mazcaritos d’Uviéu animen l’Antroxu

La comparsa, que’l vienres se desplazó a Madrid pa presentar la mazcarada d’iviernu nel Museo Nacional de Antropología, trayen l’Antroxu más tradicional a la ciudá celebrando’l Sábadu Frixueleru o’l Domingu Gordu; les actividaes finen el martes col Entierru la Sardina

Anque l’Ayuntamientu entame l’Antroxu en plena Cuaresma baxo’l títulu castellanu de ‘Carnaval’, esta folixa de tantu raigón en toa Asturies tamién se ta festexando n’Uviéu. Los Mazcaritos d’Uviéu, la mazcarada d’iviernu recuperada va 9 años, caltienen esta celebración na ciudá y dende’l Xueves de Comadres organiza actividaes que pretender recuperar el so espíritu más tradicional.

Ayeri, Sábadu Frixueleru, fixo un pasucais pel cascu históricu de la ciudá con salida y llegada en Gascona que tuvo como momentu central l’aición de plantar la Vieya nel Paragües. Una moxiganga valió pa facer risión del famosu aparcamientu del Campillín y de les lletres del alfabetu ZBE (Zona de Baxes Emisiones), pa lo que Los Mazcaritos foron acompañaos de guardia de tráficu y cochecín. La música y la danza repetióse esta mañana, con un percorríu más llargu, hasta El Fontán, con motivu del Domingu Gordu. Los personaxes de la comparsa, como la Destrozona, los zaparrastros o los diaños, animaron estes xornaes d’Antroxu y llamaron l’atención de ciudadanos y visitantes, sobre manera de los más mozos, que van ser protagonistes mañana nel Llunes d’Antroxu.

El llocal de la mazcarada en Foncalada va recibir a la reciella al meudía p’antroxalos y, yá de tarde, v entamar un aguinaldu de ‘mazcaritinos’ dende les 17 hores que va terminar con un chicolatada. L’Entierru la Sardina va tener llugar el Martes d’Antroxu con un itinerariu con salida de Gascona a les 19 hores, poniendo asina’l ramu al Antroxu.

Exemplu de mazcarada urbana

Mazcaritos d’Uviéu foi convidáu a presentar la comparsa na Fiesta de Carnaval del Museo Nacional de Antropología de Madrid como exemplu de mazcarada urbana representativa del norte peninsular y del Antroxu tradicional d’Asturies. Un centenar de personas conoció a los personaxes uvieínos y pudieron disfrutar de la so animación y bailles.