El personaxe navidiegu que reparte regalos en Nuechebona planifica’l so viaxe a Asturies dende’l mar de los Sargazos mientres l’Asociación Cultural Garabuxada entama’l concursu de dibuxu pa escolinos y facilita material a maestros pa trabayar en clase la so figura y la proteición del mediu ambiente
Yá se cuenten los díes pa que L’Anguleru, un añu más, apuerte a Asturies per El Ríu Nalón pa trayer regalos y felicidá a les neñes y neños asturianos en Nuechebona. El personaxe navidiegu ta agora nel mar de los Sargazos, onde cuida de les angules y anguiles tol añu, a la espera d’entamar pronto el so viaxe a Asturies pa, nel solsticiu d’iviernu, pescar nos ríos asturianos y, coles perres algamaes, comprar los obsequios que reparte la nueche del 24 d’avientu na so barca ‘L’Angulina’. Una historia enllena d’amor y respetu al mediu ambiente que munchos colexos asturianos trabayen estes semanes previes a la Navidá.
L’Asociación Cultural Garabuxada, impulsora de L’Anguleru, entama un añu más el concursu de dibuxu, el de decoración navidiega y caltién el Club de los Llendadores de L’Anguleru pa concienciar de la importancia de protexer los nuesos mares y ríos. Amás, facilita materiales, tanto n’asturianu como en castellanu, pa facilitar el llabor a los maestros de Llingua Asturiana y Lliteratura, y de Cultura Asturiana, de manera respeutiva. El coleutivu dispón d’una web con tolos preseos y información sobre L’Anguleru y la so actividá, y facilita un formulariu pa poder tener contautu con tolos profesores interesaos y manda-yos tolo que necesiten.
«Namás queremos que la Navidá asturiana tenga un personaxe propiu y cercanu. Nestos 18 años foi consiguiéndose gracies a la participación de más de 300 colexos y institutos de toa Asturies que lo trabayaron en clase», apunta l’asociación con sede na población de L’Arena, que nagua por que L’Anguleru y el so mensaxe siga ganando presencia nos centros escolares y nos llares asturianos.
