‘Ante’l racismu, sofitu vecinal’ ye’l nome de la campaña entamada por tres muyeres de Xixón, Bimenes y L’Entregu, xunto con dellos voluntarios, de recoyida de material de primera necesidá pa llevar a la ciudá autónoma y recaudación de perres pa comprar en negocios ceutinos; el llunes 21 van desplazarse al sur en furgoneta
Sacos de dormir, lleche, pasta, agua, comida infantil, medicamentos o productos d’hixene íntima ocupen tola mesa del llar social d’Esto Ye Ciares, ún de los puntos d’entrega en Xixón de la campaña ‘Ante’l racismu, sofitu vecinal’. Son parte de los materiales qu’un grupu de voluntarios de diferentes puntos d’Asturies ta recoyendo y que tres muyeres van treslladar en furgoneta a Ceuta el 21 de setiembre vía Sevilla dientro d’una iniciativa individual que tamién tien abierta una cuenta bancaria pa recaudar perres coles que comprar en negocios llocales de la ciudá autónoma. Una movilización que busca llevar solidaridá a ceutinos y migrantes que permanecen na ciudá autónoma depués de la entrada masiva que tuvo llugar a lo últimu de xunetu, amás de concienciar con un mensaxe claru:«Nengún ser humanu ye illegal».
Diana Luaces, de Xixón; Irene Ordóñez, de Bimenes; y Leticia Pumares, de L’Entregu, son les tres persones que van facer el viaxe, anque cuenten con una amplia rede d’apoyu nestos tres puntos, Llangréu y Uviéu pa facer posible esta iniciativa solidaria que nació en na cabeza de Luaces nun viaxe familiar per Portugal. «Diba sintiendo les noticies y escucho que delles persones tán desfaciendo’l campamentu improvisáu nes playes de Ceuta, que consistía en cuatro sábanes y cuatro palos. Aquello llamóme l’atención y prendióme la bombiella: Dalgo hai que facer», rellata. Pero, «¿cómo podía echar una mano a esa xente? A lo meyor entamando una campaña de recoyida de coses y de dineru de forma que pudiésemos despertar conciencies, combatir el racismu y fascismu, al tiempu qu’ayudamos a esa xente».
La respuesta vecinal ta siendo positiva, con puntos de recoyida en marcha nel llar d’Esto Ye Ciares (martes de 11 a 13 horas y xueves de 18 a 20), La Revoltosa y la Escuela de Danza Tango Brujo, en Xixón; la Llibrería Sol, en L’Entregu; el Manglar, n’Uviéu; y la Llibrería-Café La Llocura, en Mieres, amás d’habilitase’l domingu pasáu en La Cruz un espaciu d’entrega coincidiendo col partíu ente l’UC Ceares y l’UP Langreo. Ente los materiales solicitaos, productos médicos pa cures como gases, puntos d’aproximación, sueru fisiolóxicu, clorhexidina, antibióticos, antiinflamatorios o analxésicos; móviles, cargadores y bateríes esternes; sacos de dormir y colchonetes; y alimentos non perecederos como conserves, llegumes, pasta, arroz, aceite, lleche en polvo, galletes, etc. «Tamos viendo que la ropa d’abrigu, los sacos y les mantes son bastante importantes al entamar el fríu yá de nueche, amás de la comida», respuenden a la entruga de cuáles son los más necesarios. Amás, ta abiertu un númberu de cuenta en Caja Gijón, el ES58 3007 0001 0021 2587 0424, pa unviar donaciones económiques baxo’l conceutu ‘Sofitu vecinal Ceuta’, que tamién se pueden treslladar per Bizum al númberu de teléfonu 651.395.173.
Hasta’l vienres 18 va tar activa la recoyida, cola previsión de salir el domingu 21 en direición sur. La primer parada va ser en Sevilla. «Dexaremos el material nun almacén que recueye ayuda humanitaria y la tresllada a Ceuta», esplica Luaces énte la imposibilidá de viaxar nel ‘ferry’ cola furgoneta d’alquiler. Sicasí, les tres voluntaries van cruciar l’Estrechu pa emplegar el dineru de les donaciones «pa comprar en comercios llocales», pa lo quetán en contautu con asociaciones vecinales que tán trabayando en Ceuta nel mesmu sen. «D’esta forma pretendemos ayudar al pueblu ceutín amás d’a los migrantes», añade.
«Tamos viendo esti espertar de la estrema derecha, esta deshumanización… Queremos humanizalos otra vuelta, porque sobre’l tema de la migración podemos tener diferentes puntos de vista, ye llexítimo debatilos, pero hai una llinia que nun demos cruciar, que ye deshumanizar a les persones», comenta Luaces mientres guarda en caxes, con ayuda de voluntarios, el material entregáu hasta’l momentu polos xixoneses. Los siete díes próximos van siguir recoyendo per toa Asturies solidaridá que treslladar a Ceuta.
