La OSPA va estrenar n’Uviéu dos obres nel Conciertu Estraordinariu de les Lletres Asturianes

Va tener llugar el xueves con motivu de la XLVII Selmana de les Lletres Asturianes nel Auditoriu baxo la direición de Marco Antonio García de Paz y la participación del Coro El León de Oro

La XLVII Selmana de les Lletres Asturianes, que va desendolcase del 4 al 10 de mayu, col vienres 8, Día de les Lletres Asturianes, como xornada central, va abrise unos díes enantes n’Uviéu col Conciertu Estraordinariu de les Llestres Asturianes a cargu de la Orquesta Sinfónica del Principáu d’Asturies (OSPA). Va ser el xueves, a les 20 hores nel Auditoriu, con entrada de baldre previa retirada d’invitación, y el públicu va poder contemplar la estrena mundial de dos obres.

Trátense de ‘Missa Novus Orbis’, de Jorge Muñiz, obra destinada a forma parte del repertoriu coral contemporaneu, y ‘Sinfonía nº 1 para coro y orquesta’, de Guillermo Martínez, partitura qu’amplía l’horizonte sinfónicu dende una perspeutiva coral. La OSPA, baxo la direición de Marco Antonio García de Paz, va tar acompañada del Coro El León de Oro pa la so interpretación.

Va completar el programa del Conciertu Estraordinariu de les Lletres Asturianes, ‘Trébole’, de J. Domínguez, y ‘Asturies (suite astur)’, de J. Elberdin, Les entraes pueden retirase yá na web de la OSPA o nel propiu Auditoriu dende mañana de 09.30 a 14 hores.