El festival internacional de cultura contemporánea, dirixíu otra vuelta pol arquiteutu Alberto Morell, que tomó’l relevu del de Paniceiros depués de la so muerte, va desenvolvese’l vienres y el sábadu na capital de Valdés con actividaes qu’axunten arte, pallabra y territoriu
La desgracia quixo que Xuan Bello nun pudiera vivir la segunda edición de La Favorita, el certame multidisciplinar qu’axunta arte, pallabra y territoriu qu’ideó pa poner a Ḷḷuarca nel mapa asturianu de la espresión artística, pero, magar la so ausencia, el so ‘fíu’ sigue caminando. La Favorita, festival internacional de cultura contemporánea entamáu pol Conceyu de Valdés, celebra esta fin de selmana, vienres y sábadu, la so tercer edición con un programa qu’axunta arte, pallabra y territoriu baxo la direición del arquiteutu Alberto Morell, que tomó’l relevu del de Paniceiros depués de la so muerte, y l’esfuerzu organizativu de la compositora Claudia Vega, el direutor d’escena Fernando Renjifo y el xestor cultural Alberto Núñez.
Les actividaes van tener llugar na plaza de Carmen y Severo Ochoa ente les 20 y les 23 hores. El vienres, baxo’l títulu de los poemes ‘El nacimientu de les roses’ o ‘El cantar de la bruxa’ de Bello, articulóse una programación que va abrir la llectura del pregón ‘De Luarca al mundo, del mundo a Luarca, ¡que todo el mundo se entere’, a cargo de Lorenzo García-Andrade, Jonás de Murias y Flavio Benito; la intervención arquiteutónica ‘Trazado del círculo’, de Morell y Carlos Asensio; una ‘queimada’ comunitaria; un conciertu de guitarra flamenca d’El Peli; y una llectura de testos del ideólogu del festival xunto a una foguera.
Pal sábadu, con ‘Retayos d’un poema futuru’ como inspiración, va entamase un conciertu de gaita, flauta y tecláu con llectura de testos a cargu deFlavio Benito y Óscar Camacho; una intervención de danza de Melissa Herrada; una ‘performance’; la reconstrucción en cartón d’una cúpula xeodésica inspirada nel arquiteuto Fuller. dirixida por Carlos Asensio Wandosell; y una esperiencia sonora inmersiva a cargu d’Álvaro Arias.
