L’empresariu punxo esti martes la conferencia ‘Vusté como yo. L’asturianismu conservador y otres renuncies por incomparenciencia’ nel actu de receición que tuvo llugar nel salón d’actos de la institución
Ramón Rodríguez Álvarez, presidente del Real Instituto de Estudios Asturianos (RIDEA), recibió ayeri a Inaciu Iglesias como miembru correspondiente de la institución. Foi nun actu nel que l’empresario punxo la conferencia de receición ‘Vusté como yo. L’asturianismu conservador y otres renuncies por incomparenciencia’, que contó cola presentación de Ramón d’Andrés y la presencia de la conseyera de Cultura, Política Llingüística y Deporte, Ana Vanessa Gutiérrez. Un reconocimientu pal empresariu, persona mui venceyada al mundu de la cultura nel so papel d’editor y ensayista, que siguió numberosu públicu, como amuesa que nun quedaran sielles llibres nel salón d’actos del edificiu de la institución na uvieína plaza Porlier.
El so llibru últimu ye ‘Sin dientes no puedes ir’ (Ediciones Trabe), que recueye artículos asoleyaos en prensa ente’l 2021 y el 2025, pero enantes asoleyara otros títulos como ‘La identidá asturiana’, ‘Independencia’, ‘Soy empresario, lo confieso’, ‘Fuimos quien’, ‘El país que queremos’, ‘Propietarios del mundo, uníos’ o ‘Tu como yo. El nacionalismu vistu d’otra manera’. Nel so papel d’editor, el conseyeru delegadu de Cartonajes Vir fundó Publicaciones Ámbitu y punxo na cai’l selmanariu ‘Les Noticies’, periódicu n’asturianu dafechu, que tuvo nos quioscos dende’l 1996 al 2012, tiempu nel que se publicaron 769 númberos. Iglesias va siguir agora dende’l RIDEA contribuyendo al estudiu y espardimientu de la cultura y llingua asturiana.
«La incorporación d’Inaciu Iglesias refuercia la presencia de voces fundamentales del asturianismu contemporaneu nel RIDEA y reconoz una trayectoria comprometida cola llingua, la cultura y la creación d’espacios de comunicación y difusión cultural n’Asturies», valoraron dende la conseyería.
