POR BORJA PINO Y PABLO R. GUARDADO
Cola comunidad educativa pendiente de que’l Ministeriu modifique los Reales Decretos estatales, dalgo previsto pa la seronda, na Conseyería nun creen que sía viable llegar a les oposiciones próximes, aunque prometen incorporala «lo más pronto posible»
Un día depués de la histórica anuncia nel que los gobiernos central y rexonal confirmaron la modificación próxima de los Reales Decretos estatales necesarios pa que la especialidá docente de Llingua Asturiana y Eonaviego sía reconocida, ye hora d’aparcar la euforia, d’analizar con oxetividá lo algamao… Y d’entender y asimilar los sos condicionantes; ún d’ellos, por cierto, ye’l tiempu. Col Ministeriu d’Educación falando de lo último de la seronda como horizonte pa facer les mentaes modificaciones, a lo qu’habrá siguir la redaición del Decretu autonómicu pertinente, na Conseyería del ramu ven «difícil» qu’haya marxe abondo pa incorporar esa nueva especialidá a les oposiciones de xunu del 2027. Manifestólo asina esta mañana la titular del área, Eva Ledo, que, sicasí, prometió que se fadrá «na primer convocatoria posible». Pallabres les suyes que nun convencieron a los coleutivos en defensa del asturianu, que reclamen a les Alministraciones qu’entaínen colos plazos.
La primera en pronunciase al respeuto foi la presidenta de l’Asociación de Docentes d’Asturianu y Eonaviego/Gallego-asturiano (ADAE), Claudia Menéndez. Momentos enantes de xunise a la xunta na que conseyería, sindicatos y dichos coleutivos revisaríen de primer mano los detalles del citáu alcuerdu, Menéndez pidió velocidá na tramitación, de mou que la especialidad tenga güecu a nun tardar nel abanicu d’opciones de los profesores. Una postura análoga defendió dende Iniciativa pol Asturianu la so vocal d’Educación, Marta Mori, anque poniendo’l foco na condición de «primer pasu históricu» hacia la oficialidá lo algamao ayeri en Madrid. Y esa mesma estela siguió Xosé Candel, representante de la Xunta pola Defensa de la Llingua Asturiana (XDLA), consciente de que, anque la creación de la especialidá «nun supón por sí mesma la oficialidá», sí que «da puxu a la reivindicación pa dignificar l’enseñu del asturianu, y ameyorar les condiciones de los alumnos».
¿Y qué dicir de los sindicatos, sectoriales o de clase, tercer actor d’esta obra? Pues bien, la perceición xeneral ye positiva, mui positiva. Asina reconocíalo, na delegación asturiana de l’Asociación Nacional de Profesionales de la Enseñanza (ANPE), Mariela Fernández, pa la que lo asocedío nun dexa de ser l’avance de la «xusticia llaboral» al poner a los docentes «n’igualdá de condiciones», independientemente de la materia impartida. Daqué similar plantegaba Miguel Laria, voceru del Sindicatu Unitariu y Autónomu de Trabayadores de la Enseñanza d’Asturies (SUATEA), seguru de que’l pasu corrixe «una inxusticia llaboral» y atiende «una reivindicación llingüística histórica», anque non ayenu a qu’entá queda per delante una llarga tramitación normativa hasta que los efeutos se faigan visibles. Los últimos n’espresase foron Sergio Naves, de Comisiones Obreres (CCOO), feliz de que se punxera fin a la esistencia de «profesores de primera y de segunda»; y Seila Quirós, de la Unión Xeneral de Trabajadores (UXT), satisfecha al comprobar que’l testu permitirá acceder a la función pública docente «n’igualdá de condiciones».
