Asturies vive esti vienres la gran fiesta de la so lliteratura cola promoción de llibros y discos n’asturianu en mediu centenar d’establecimientos y la celebración del actu académicu nel uvieín Teatru Campoamor, nel que se recibirá a Ruth González Rodríguez y Alberto Fernández Costales como numberarios, y a Paquita Suárez Coalla como miembru correspondiente de l’ALLA
Si en dalguna ocasión pensasti en garrar un llibru del bayurosu catálogu esistente d’obres n’asturianu y ponete a descubrir la riqueza de la llingua asturiana, güei ye’l meyor momentu pa facelo. Asturies celebra’l XLVI Día de les Lletres Asturianes y mediu centenar de llibreríes de tol territoriu saquen a los sos escaparates les últimes novedaes y los grandes títulos de la nuesa lliteratura, establecimientos qu’ufren un 10% de descuentu tanto n’obres lliteraries como en discos n’asturianu o eonaviego. Amás, tolos veceros van recibir de baldre el llibru conmemorativu de la XLVI Selmana de les Lletres Asturianes, ‘Xosé Álvarez, Pin. Asturies siempre’, con artículos sobre l’autor al que se-y dedica esta edición, o’l poemariu ‘El equilibrio delicado del funámbulo’ de Conchita Álvarez Lebredo si se compra un exemplar na llingua del occidente.
Enantes del meudía yeren pocos los llectores que s’averaren a les diferentes llibreríes, onde s’espera la mayor demanda según avance’l día y la xente fine coles sos obligaciones llaborales. «El Día de les Lletres va siempre bien. Los llectores de lliteratura n’asturianu son menos, eso ye evidente, pero ye un día nel que muncha xente s’avera a entrugar por dalgún llibru n’asturianu. Nun son llectores habituales, pero aprovechen la escusa pa dir empezando», espresa Rafa Gutiérrez, propietariu de La Buena Letra, que tamién recibe la visita nesta xornada de «neños, los que van a clase d’asturianu, que suelen averase pela tarde a garrar dalgún llibrín, y los llectores habituales d’asturianu, que tamién vienen nesti día».
Otra llibrería que participa nesta celebración ye Paradiso. «Tenemos toles novedaes que salen y muncha poesía, véndese muncha poesía», esplica Guillermo Monje, trabayador del establecimientu. «A estes hores nun podemos valorar l’afluencia, pero tolos años vienen llectores habituales, muncha xente mozo que ta pol asturianu y munchu asturianista que vien siempre», esplica. El gran reclamu, amás del descuentu, ye’l llibru conmemorativu, «porque ye mui interesante, son ediciones mui guapes, y los veceros quiérenlu pol coleicionismu».
Echa en falta más difusión pal eventu Jorge Melón, de la Central. «Pasa desapercibíu. Hai persones que vienen dos o trés díes tarde, a les que-yos damos el llibru si entovía lu tenemos; a lo meyor tien poca visibilidá y promoción, y tamién poca presencia nos medios», analiza. Sobre la xornada, apunta que «ta la cosa tranquila por agora. Güei ye’l día grande, fiximos dalguna venta, pero ta tranquilo. Nun hai una demanda escesiva y eso que se ponen medios porque regalen un llibrín y hai un descuentu. Tampoco’l día nun acompaña, pero esperemos que vaya ameyorando».
En Xixón, amás d’este trés llibreríes, incorpórense a la celebración Acuarel, Amez, De Bolsillo, Clarín, Gizzmo Cómics, La Habitación Propia, La Madriguera, La Revoltosa, Roy, Mundo Sonoro y Musicasturiana.com, mientres que n’Uviéu fáenlo Aldaba Regalos, Aldebarán, Antares, Casa del Libro (tamién eonaviego), Cervantes (tamién eonaviego), Diocesana, Elías, Esfera, Garluc, Hangar Rebelde, Matadero Uno (también eonaviego), Pasa Página, Puntos, San Pablo y Trabe (tamién eonaviego). Amás, hai establecimientos con descuentu n’Avilés (Casona, Clarín, La Crisálida, Elepé Producciones y Tiza y Peonza), Mieres (Disco 55, La Llocura, La Pilarica y La Torre), A Veiga (Patefa y San Pedro), Siero (Fnac y La Chimenea), Cangas del Narcea (Treito), El Franco (Alfonso), Grau (Las Dos Vías), Llaviana (Arvin), Noreña (La Semeya), Parres (Gestión), Piloña (Rima), Samartín del Rei Aurelio (Sol) y Tapia (Manuel López).
Actuaciones de Lorena Corripio y de La Reina del Truébano
L’actu pol XLVI Día de les Lletres Asturianes va tener llugar a les 19 hores d’esta tarde nel uvieín Teatru Campoamor, eventu qu’entama l’Academia de la Llingua Asturiana (ALLA) que se va poder siguir en direuto en TPA. La cantadora Lorena Corripio y el gaiteru Vicente Prado ‘El Praviano’ van encargase d’abrir la cita con una asturianada, pa depués dar pasu a los académicos dende la entrada del teatru hasta l’escenariu pel pasiellu central. Ehí van recibise a los dos nuevos numberarios, la filóloga estudiosa del eonaviego Ruth González Arias y Alberto Fernández Costales, caderalgu de Didáutica de la Llingua y la Lliteratura de la Universidá d’Uviéu. Tamién a la filóloga y profesora de The City University of New York, Paquita Suárez Coalla, nesti casu como miembru correspondiente.
Llueu de les correspondientes intervenciones de los académicos nuevos, el discursu del presidente de la institución, Xosé Antón González Riaño, centrará toles miraes. Una llectura de poemes del númberu 41 de la revista ‘Lliteratura’, asoleyada recién, y l’actuación de les banda de gaites naviega La Reina del Truébano precederán a la interpretación del himnu d’Asturies, que va poner el ramu a la xornada.
Manifestación pola oficialidá, el sábadu
Llueu de la pandemia, la manifestación de la Xunta pola Defensa de la Llingua Asturiana (XDLA) con motivu de les Día de les Lletres Asturianes treslladóse del vienres pela tarde al sábadu pela mañana, un cambiu que vieno pa quedar. Asina, a les 12 hores, va salir de la Estación del Norte d’Uviéu (RENFE) pa percorrer la cai Uría hasta la Escandalera pa reclamar la oficialidá del asturianu y del gallego-asturiano. Ellí va actuar 6 Riales, formación de moces con un repertoriu de cantares tradicionales y cantares nuevos, con panderetes, panderos y otres percusiones, que ta acabante d’incorporar a Elena Granda, pasando asina de tríu a cuartetu.
