Miles de romeros, polesos y desplazaos d’otros puntos de la comunidá, xubieron esti llunes hasta La Sobatiella para disfrutar d’una merienda en comuña bañada con sidra y amenizada por delles charangues, pa depués siguir la fiesta per La Pola
La escena tornó a ser espectacular. Miles de persones axuntaron ayeri en La Sobatiella pa festexar El Carmín, pa munchos la romería d’Asturies, la mayoría col so pañuelu azul nel pescuezu cola Cruz de la Victoria. Una fiesta qu’hai que visitar polo menos una vez na vida, llave pa tornar, porque ye raro que’l que lo faiga nun quiera repetir.
A les 17 horas, col sol nel cielu, entamó la siempre animada xuba al prau, daqué que los polesos nun quieren perder. Arriba, en La Sobatiella, yá taba too preparao, coles parceles acutaes, mientres que romeros d’otros puntos d’Asturies principiaben a llegar n’autocares privaos o de llinia, y coches particulares. Nun tardaríen en correr los primeros culetes, acompañaos de tortielles, empanaes o preñaos, mientres el cielu nublaba, daqué qu’agradeció un bon piñu de xente. Y de fondu, música, la de les charangues qu’animen la fiesta nuna xornada pa vivir en familia y ente collacios.
La fiesta allargaríase pela nueche, cuando la xente abandonaba’l prau y baxaba a la villa a disfrutar de la orquesta o DJs. Pero eso yá ye otra historia…
