El festival consolídase como una cita imprescindible pa los siguidores de la música asturiana nes sos diferentes vertientes
El sábadu pasáu, la sala La Lata de Zinc d’Uviéu enllenóse hasta arriba pa celebrar una edición nueva del Semando Fest, un eventu qu’axuntó a delles de les bandes más destacaes de la escena mozo d’Asturies. Con un públicu entusiasta y mayoritariamente xoven, la nueche tuvo marcada pola fusión de la música tradicional asturiana con soníos modernos y enerxía arrolladora.
Abeú foi l’encargáu d’abrir la nueche. La banda moza amosó la so pasión y entrega dende’l primer minutu, faciendo vibrar a los asistentes cola so interpretación de la música tradicional asturiana. L’entusiasmu del públicu foi tal que les dos primeres fileres de la sala se convirtieron nuna improvisada pista de baille onde los asistentes nun duldaron en dexase llevar polos ritmos festivos del grupu. El testigu pasó entós a Ferla Megia, un artista que ta siguiendo la buelga de Rodrigo Cuevas al combinar la música asturiana con soníos contemporáneos como’l trap y la electrónica. La so actuación nun dexó indiferente a naide y llogró prender entovía más l’ambiente, con un públicu entregáu y dispuestu a movese al ritmu de les sos propuestes innovadores.
A continuación, llegó’l turnu d’Alienda, una banda con más d’una década d’esperiencia nos escenarios. El so folk asturianu puru, adornáu cola presencia de la gaita y el violín, ufrió un momentu de gran intensidá musical. La voz de Bárbara, la so violinista, rescampló sobre manera nuna actuación que dexó buelga nos asistentes. La banda continuará llevando la so música a escenarios nuevos y esti añu va tar presente nel Festival Interceltique de Lorient. Pa pesllar la nueche, Melandru xubió al escenariu cola so potente propuesta de rock fusionáu con música asturiana. Con una combinación de guitarra, baxu, batería y gaita, consiguieron poner el broche d’oru al festival con un soníu contundente que prestó a los amantes del folk-rock.
El Semando Fest entámalu Ixuxú Cultura y Musica Asturiana y cuenta col sofitu de Caja Rural de Asturias, ente otres entidaes.
