«El mayor fitu históricu nel procesu de recuperación llingüística n’Asturies»: el ministeriu desbloquia la especialidá d’asturianu

La demanda histórica de la comunidá educativa, pendiente dende’l 1984 y solicitada per primer vez pol Gobiernu asturianu nel 2001, va ser atendida por Madrid, según confirmó esti xueves la ministra Milagros Tolón tres una xunta col presidente Adrián Barbón y la conseyera Eva Ledo

Nel 1984 entamó la escolarización del asturianu en delles escueles d’Asturies, pa llegar a tol sistema educativu darréu, con maestres y maestros al frente que compartíen centros con otros profesores faciendo’l mesmu llabor pero ensin los mesmos derechos al nun contar la materia con especialidá docente. Nun sería hasta’l 2001 cuando, per primer vez, yá cola Llei d’Usu y Promoción del Bable/Asturianu del 1998 vixente, la Viceconseyería d’Educación dio’l pasu de la homologación de l’asignatura d’asturianu, daqué que permía la norma y que llevaba consigo la creación d’una ‘plantía’ específica d’esta materia de conocimientu. Pero’l Gobiernu central, col PP al frente, al nun considerar al asturianu como una materia básica na educación reglada, frenábalo y avisaba de qu’Asturies nun tenía capacidá llegal pa crear la especialidá.

Dende entós, en múltiples ocasiones esixóse, con consensu de la Xunta Xeneral y delles fórmules sobre la mesa, esta posibilidá que, hasta ayeri, nun se desbloquió. La vía de la modificación de los reales decretos d’especialidaes, una operación cenciella pa la que namás facía falta voluntá política, como veníen repitiendo los sindicatos educativos y los propios docentes, organizaos recién como coleutivu al traviés de l’Asociación de Docentes d’Asturianu y Eonaviego/Gallego-asturiano (ADAE), aceptóse finalmente en Madrid depués d’años de negatives col argumentu de que laúnica solución yera la declaración d’oficialidá. Ayeri anunciólo la ministra Milagros Tolón, a la salida d’un conceyu col presidente Adrián Barbón y la conseyera Eva Ledo, na que tamién tuvo presente’l secretario d’Estáu d’Educación, Abelardo de la Rosa. Pa ello, la insistencia del Executivu asturianu y de Sumar, sociu de gobiernu del PSOE, foi fundamental.

Un gran pasu pal asturianu y el gallego-asturiano, pero tamién pal aragonés, yá que la modificación normativa que se pondrá en marcha permitirá la creación d’especialidá docente d’aquelles llingües que nun son oficiales pero que tienen reconocimientu jurídicu nos sos estatutos, casu del propiu asturlleonés tamién en Castilla y Lleón. Han de ser les propies comunidaes autónomes les que desendolquen la especialidá y convoquen los procedimientos pa cubrir eses places. O lo que ye lo mesmo, nel casu d’Asturies, pa dar opción a los más de 300 maestros y maestres de Llingua Asturiana y Gallego-asturiano de presentase a unes oposiciones y contar colos mesmos derechos llaborales que los sos compañeros de centru.

«Tuvieron que pasar 42 años pa facer xusticia»

L’Academia de la Llingua Asturiana (ALLA) valoró l’anuncia de la ministra «el mayor fitu históricu nel procesu de recuperación llingüística n’Asturies». «Tuvieron que pasar 42 años —nun s’escaeza que la enseñanza del asturianu entama en 1984— pa facer xusticia a un profesoráu que, teniendo dende cuantayá les mesmes esixencies de formación universitaria que’l restu de docentes, nun podía hasta esti momentu acceder a la condición de funcionariu pente medies de los concursos d’oposición y n’igualdá de condiciones que’l restu de docentes», destacala institución, que recuerda que «la esixencia de la especialidá docente foi, xunto col derechu constitucional a la oficialidá, la principal reclamación del asturianismu cultural de magar la década de los 80 del sieglu pasáu con organizaciones como’l Coleutivu ‘Llingua y Enseñanza’ qu’axuntaba a profesores d’asturianu de toles estayes educatives (dende la educación infantil a la universitaria) o con instituciones como la propia Academia que, al traviés de la so estaya pedagóxica, llegó a caltener xuntes col Ministeriu d’Educación del Gobiernu de Rajoy, pero ensin los llogros que tanto necesitaba’l sistema educativu n’Asturies».

Nun comunicáu, destaca’l llabor xugáu pol Gobiernu, sindicatos educativos y, «de mou especial», por ADAE, «pol so protagonismu, intelixencia y puxu pa ser a caltener nos caberos años una reinvindicación histórica qu’agora mesmo recueye’l so mayor éxitu y fai posible que nos colexos ya institutos d’Asturies el profesoráu d’asturianu tenga la mesma dignidá que’l restu y pueda collaborar con enfotu a la meyora de la calidá educativa de la nuesa comunidá autónoma». La presidenta d’esti coleutivu, que de momentu caltién la concentración prevista pal martes a les 12.30 hores frente a Presidencia, Claudia Menéndez, apuntó a miGijón que «celebramos obviamente’l compromisu, pero vamos siguir ehí encima» pa que la modificación de los reales decretos nun se dilate nel tiempu.