El xuráu del concursu del que sal la sidra oficial de la gran espicha xixonesa de Selmana Santa, qu’esti añu se tresllada al Recintu Ferial Luis Adaro, escoyó per segundu añu producción del llagar sierense nuna preba a ciegues llueu d’un desempate
Igualdá máxima nel concursu XV Meyor Primer Sidre l’Añu na final celebrada na tarde d’ayeri na sidrería xixonesa La Montera Picona de Ramón énte numberosos asistentes qu’acudieron a ver la preba a ciegues y les deliberaciones de los miembros del xuráu. Llueu de la primer votación, dos llagares taben igualaos tanto na primer como na tercer posición, polo qu’hebo que dir a una ronda de desempate entrambos casos. Finalmente sería la sidra del Llagar La Morena (Siero) la que resultaría ganadora per segundu añu después de facelo na edición pasada cola so DOP, Prado y Pedregal, mentes que Prau Monga de Viuda de Angelón (Nava) y Cabueñes (Xixón) foron segunda y tercera, de manera respeutiva.
D’esta forma, La Morena va ser la sidra oficial de la XV Primer Sidre l’Añu, que va desendolcase la selmana próxima, de Xueves Santu a Domingu Santu, nun allugamientu nuevu, el Recintu Ferial Luis Adaro. Alfonso Prado púnxose, ente aplausos del públicu y del restu de llagareros, la montera de la Primer Sidre l’Añu que lu distingue comu campeón nuna final a la que tamién se clasificaren Germán (Avilés), Huerces (Xixón) y Piñera (Xixón).
Manuel G. Busto presidió’l xuráu que valoró a ciegues la sidra presentada a concursu, que s’encargó d’echar Alejandra Venegas, al igual que na primer fase celebrada’l sábadu. Al acabar les votaciones, el público presente pudo prebar esta sidra nuevo, ensin trasegar, de los seis llagares finalistes.
