L’Ayuntamientu propón ente los meses de xunetu y setiembre itinerarios guiaos, trayeutos etnográficos, de cicloturismu o senderismu, xeorrutes o bus turísticu pa visitar les ayalgues culturales, naturales, históriques y etnográfiques mierenses
Ye habitual nos meses de branu viaxar pa conocer aprovechando les vacaciones. La mayoría opten por destinos de costa o viaxes llargos a otros países, pero cerca de casa tamién ye posible atopar auténtiques ayalgues culturales, naturales, históriques y etnográfiques, munches veces desconocíes pa la mayor parte d’asturianos. Un exemplu ye Mieres, un conceyu del centru del territoriu qu’ufre milenta posibilidaes y que, per aciu d’una iniciativa de la conceyalía de Turismu, pon agora a disposición de tola ciudadanía de baldre.
Depués de que mediu millar de persones de dientro y de fuera d’Asturies participaren l’añu pasáu nuna iniciativa de rutes turístiques nos meses de branu, el Conceyu repite nésti con un programa ampliu qu’inclúi 39 visites guiaes, trayeutos etnográficos, de cicloturismu o senderismu, xeorrutes o bus turísticu. Les places tán llendaes, polo que será necesario formalizar reserva previa na web municipal pa pa poder participar nelles.
La primera de les actividaes va tener llugar esti vienres, a les 17.30 hores, y va consistir nuna visita guiada al Pozu Santa Bárbara, onde poder conocer la esposición ‘Speculum’ del coleutivu d’artistes SMACK. El domingu, mentes, ta prevista dende les 10 hores una ruta pela sienda verde de Lloreo, mesma xornada na que’l bus turísticu con guía acompañante, que dio’l so primer viaxe’l domingu pasáu, va repetir ente les 10 y les 14 hores la ruta qu’arranca de la Casa Conceyu pa percorrer el Pobláu Minero de Bustiello, Pozu Espinos, Pozu Santa Bárbara y La Coḷḷadieḷḷa, pa tornar a Mieres. Pue consultar el programa completu nesti enllaz.
