El ciclista castrillonense de 22 años, cuartu na Vuelta a Asturias 2025, firma pa les tres temporaes próximes pol únicu equipu español con llicencia UCI WorldTeam; va ser el segundu corredor de la comunidá nel equipu tres la marcha del xixonés Iván García Cortina al Alpecin-Premier Tech
Movistar Team sigue incorporando talentu asturianu al equipu. L’únicu equipu español con llicencia UCI WorldTeam, qu’asegura presencia nes tres grandes vueltes, ficha a Hugo de la Calle, ciclista castrillonense de 22 años que da’l saltu a la élite después de dos años nel Burgos Burpellet BH. «Tengo una ilusión inmensa, amás de sentime perprivilexáu por poder vistir los colores del equipu que llevo viendo tola vida pela tele, onde corría’l mio ídolu Valverde. Ye más qu’un suañu. Toi deseando que sía’l 1 de xineru para vistir los colores y devolver al equipu la confianza que deposita en min», declara’l deportista.
Venceyáu a Avilés, De la Calle dio’l saltu al profesionalismu nel 2025 col fichaxe pol Burgos depués de proclamase campeón de España sub-23. Nel so primer añu como profesional firmó un cuartu puestu en la Vuelta a Asturias a 4:27 del ganador Marc Soler, prueba qu’esta campaña tuvo qu’abandonar por una cayida, y corrió La Vuelta, amosando una progresión continua. Un segundu puestu nuna etapa del GP Beiras e Serra da Estrela foi’l so meyor resultáu d’esti 2025, nel que tuvo bones actuaciones nel Tour de Slovénie y en carreres d’un día.
«Siento agradecimientu máximu tanto al equipo, pola confianza depositada en min, como a tol entornu que m’ayudó a crecer y ameyorar pa cumplir los suaños que tenía un neñu de 5 años qu’entamaba a correr en bici», espresó. Mentes, Sebastián Unzúe, responsable del Área Deportiva del Movistar, apunta que «tamos mui contentos d’anunciar la llegada d’Hugo al nuesu equipu. Ye un corredor mozu que nun dexó de progresar temporada tres temporada. Magar la so mocedá, tamos convencíos de que la so aportación va ser mui importante nos años próximos».
De la Calle va contar ente los sos compañeros con otru asturianu, Pelayo Sánchez, que va cumplir el so cuartu añu nel Movistar. Iván García Cortina, mentes, dexa’l conxuntu español pa integrar les files del belga Alpecin-Premier Tech de Philipsen y Van der Poel.
